Introduksyon

Kailan, saan at paano nagsimula ang pagkain ng aso sa Pilipinas? Usapin ba ito ng pagkakaiba ng kultura at paniniwala sa pagitan ng mga kumakain ng aso at ng mga hindi kumakain nito sa kasalukuyang panahon? Ano ang implikasyon nito sa pagkamamamayang Pilipino ng mga kasangkot sa isyu? Ito ang mga tanong na tinatangkang sagutin sa pananaliksik na ito.

Kung kinakain ang karne ng kabayo sa Belgium, France at ibang bahagi ng Europa, kinakain naman ang aso sa ilang bansa sa Latin Amerika, China, Taiwan, Korea, Vietnam, Thailand at Pilipinas.

Iba-iba ang pagtingin dito ng iba't ibang kultura: Kung inakusahan ng artistang si Brigitte Bardot ang mga Koreano bilang "barbarians" dahil sa pagkain ng aso, ibinalik naman ito sa kanya ni Propesor Yong Geun Ann ng Chungcheong College ng Korea sa pagsasabing kumakain din naman ng aso ang mga Pranses batay sa mga nakatalang kasaysayan ng Franco-Prussian War.^[1]

Nanghihilakbot ang mga Amerikano at iba pang lahi sa viande de chevaline^[2] ng Belgium at ng boucheries chevalines^[3] sa France; Gayundin ang panghihilakbot ng mga ito sa asocena^[4] at kalderetang aso ng Pilipinas; o sa bo-shintang^[5] at boekum^[6] ng Korea.

Bukod sa mga Asyano, kumakain din ng aso ang ibang kultura sa Latin Amerika. Inaalagaan umano ng mga Aztec sa Mexico ang aso nitong may lahing Xoloitzquintli, walang buhok na aso, upang kainin. Mahirap nang hanapin ang lahing ito ng aso sa kasalukuyan.^[7]

Mukhang mabigat ang kalaban ni Brigitte Bardot (nangampanya laban sa pagkain ng kabayo hanggang sa kanyang kamatayan) dahil laganap sa buong mundo ang pagkain ng karne ng kabayo: mayrong pastissada (nilaga) at pizzeti di cavallo (isinahog ang pinalambot ng paa ng kabayo) ang mga Italyano; basashi (palamang kabayo), yakiniku (barbecue) at baniku (skewed horsemeat) ang mga Hapon; paardenrookvlees (pinausukang kabayo para sa almusal) ang mga Holandes; fondue bourguignonne (ice cream mula sa karne ng kabayo) ang mga Swiso; o sauerbraten (sweet-sour braised meat na karne ng kabayo ang tradisyunal na gamit) ang mga Aleman.^[8]

Sa Pilipinas, mabigat din ang sagutan ng mga kumakain ng aso at ng mga hindi kumakain nito lalo na noong naipasa ang batas na nagbabawal sa pagkakatay at pagkain ng aso, ang Animal Welfare Act (Republic Act 8485).

Lalo pa itong pinaigting nang mismong si Pangulong Gloria Macapagal Arroyo ang nagtanong kay Baguio City Mayor Braulio Yaranon nang minsang mag-host ang Pangulo ng hapunan sa The Mansion, kanyang official residence sa Baguio noong pagpasok ng Bagong Taon: "Dog meat keeps you warm, does it?"^[9]

Napunta sa putaheng aso ang usapan nang magkuwento si Mayor Yaranon kung paano ihawin sa La Union ang malalaking paniking may isang metrong haba ang pakpak.

Lumaki si Ginang Arroyo sa Pampanga na kumakain ng mga eksotikong pagkain tulad ng sinangag na balang, burong talangka, tugak, kamaru at bayawak. Bagaman at hindi siya tahasang nagsabing kumakain ng asocena, isa sa mga espesyalidad ng Pampanga, mababasa naman sa tanong niya ang hindi katiyakan sa kawastuhan o hindi ng pagkain ng aso.

------------

[1] http://wolf.ok.ac.kr/-annyg/english/e6.htm

[2] karne ng kabayo

[3] mga butcher shops na nagtitinda ng karne ng kabayo

[4] mula sa salitang Filipino aso at salitang Espanyol na cena na nangangahulugang hapunan.

[5] Sabaw ng aso

[6] putaheng aso

[7] Dog, The Other White Meat@Everything2.com

[8] http://e.wikipedia.org/wiki/Horse_meat

[9] Vincent Cabreza. President Arroyo Defends Dog Eating. Philippine Daily Inquirer, 1 January 2006,  pp. A1.

1 | 2 | 3 | 4 | 5 | 6 | NEXT>

How You Can Help